ଆଜି ପବିତ୍ର ହେରାପଞ୍ଚମୀ,ବଡ଼ଦାଣ୍ଡରେ ବିଜେ ହେବେ ମହାଲକ୍ଷ୍ମୀ

0

ପୁରୀ: ଆଜି ପବିତ୍ର ହେରାପଞ୍ଚମୀ । ବଡ଼ଦାଣ୍ଡରେ ବିଜେ ହେବେ ମହାଲକ୍ଷ୍ମୀ । ଗୁଣ୍ଡିଚାଘରକୁ ଯାଇ ମହାପ୍ରଭୁଙ୍କ ଦର୍ଶନ କରିବା ସହ ରାଗରେ ଭାଙ୍ଗିବେ ନନ୍ଦିଘୋଷ । ଧର୍ମପତ୍ନୀଙ୍କୁ ସାଙ୍ଗରେ ନଆଣି ବଡ଼ଭାଇ ଓ ଭଉଣୀଙ୍କୁ ନେଇ ରଥଯାତ୍ରାରେ ଯାଇଛନ୍ତି ମହାପ୍ରଭୁ । ଏଣୁ ପ୍ରଚଣ୍ଡ ଅଭିମାନରେ ଲକ୍ଷ୍ମୀ ଠାକୁରାଣୀ ମହାପ୍ରଭୁଙ୍କ ନନ୍ଦିଘୋଷ ଉପରେ ରାଗ ଶୁଝାଇବେ । ସେଠାରୁ ରାଗ ତମତମ ହୋଇ ହେରାଗୌରୀ ସାହି ଦେଇ ଶ୍ରୀମନ୍ଦିରକୁ ବାହୁଡ଼ି ଯିବେ ଠାକୁରାଣୀ ।

ଗୁରୁବାର ଜନ୍ମବେଦିରେ ମହାପ୍ରଭୁଙ୍କ ବନକଲାଗି ନୀତି ଅନୁଷ୍ଠିତ ହୋଇଛି । ମହାପ୍ରଭୁଙ୍କ ଦତ୍ତ ମହାପାତ୍ର ସେବକମାନେ ଠାକୁରଙ୍କ ଶ୍ରୀମୁଖ ସିଂହାର କରିଛନ୍ତି । ବନକଲାଗିକୁ ଦତ୍ତ ପ୍ରବେଶ କରିଥିଲେ ଅପରାହ୍ନ ୫ଟା୪୫ ମିନିଟ୍‌ରେ । ଦ୍ୱିତୀୟ ଭୋଗମଣ୍ଡପ ନୀତି ପରେ ଏହି ନୀତି ସମ୍ପନ୍ନ ହୋଇଛି ।

ଶୁକ୍ରବାର ଶ୍ରୀମନ୍ଦିରରୁ ମା’ଲକ୍ଷ୍ମୀଠାକୁରାଣୀ ଆସି ଗୁଣ୍ଡିଚାମନ୍ଦିରରେ ବିଜେ ହେବେ ।ରାତି ସାଢେ ୯ଟାରେ ଠାକୁରାଣୀ ଗୁଣ୍ଡିଚାଘର ଜଗମୋହନରେ ବିଜେ ହେବାର ନୀତି ଧାର୍ଯ୍ୟ ହୋଇଛି । ଏହି ନୀତି ବହୁଳ ଦିନପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ ପ୍ରସ୍ତୁତ ହୋଇଛି । ପ୍ରାତଃ ୪ଟାରେ ଗୁଣ୍ଡିଚାଘର ଦ୍ୱାର ଫିଟି ଚତୁର୍ଦ୍ଧାମୂର୍ତ୍ତିଙ୍କ ମଙ୍ଗଳ ଆଳତି ୫ଟାରେ ବଢିବ । ମଇଲମ-ତଡପଲାଗ ନୀତି ସାଢେ ୫ଟା, ଅବକାଶ ୬ଟାରେ ହେବ । ଏହାପରେ ଅନ୍ୟାନ୍ୟ ନୀତି ଓ ବେଶ ବଢ଼ି ଠାକୁରଙ୍କ ସକାଳ ଧୂପ ପୂର୍ବାହ୍ନ ୧୦ଟାରୁ ୧୧ଟା୩୦ ଭିତରେ ହେବ । ୧୨ଟା୩୦ମିନିଟ୍‌ ସୁଦ୍ଧା ଭୋଗମଣ୍ଡପ ସରି ମଇଲମ, ଯାତ୍ରାଙ୍ଗୀ ମହାସ୍ନାନ, ଘଣ୍ଟଛତା ସର୍ବାଙ୍ଗ , ବେଶ, ମଧ୍ୟାହ୍ନ ଧୂପ(ଘଣ୍ଟଛତା), ଦ୍ୱାଦଶ ଯାତ୍ରା ବନ୍ଦାପନା ୫ଟାରେ ଅନୁଷ୍ଠିତ ହୋଇ ୨ୟ ଭୋଗ ମଣ୍ଡପ ଉଠିିବ ।ସନ୍ଧ୍ୟା ସାଢ଼େ ୬ଟାରେ ଶାଢୀଖଣ୍ଡୁଆ ଲାଗି ହୋଇ ସନ୍ଧ୍ୟାଆରତ ବଢିବ ।

ମହାପ୍ରଭୁଙ୍କ ବାଡରେ ୭ଟାରେ ମହାସ୍ନାନ ହୋଇ ତିନି ବାଡ଼ରେ ଘଣ୍ଟଛତା ସର୍ବାଙ୍ଗ ସାଢେ ୭ଟାରେ ହେବ । ଏହାପରେ ନୂଆଲାଗି ହୋଇ ଠାକୁରେ ୬ମୂର୍ତ୍ତି ଅଳଙ୍କାର ଲାଗି ହେବେ । ସନ୍ଧ୍ୟାଧୂପ ଡାକିଯିବ ସାଢେ୮ଟାରେ । ସନ୍ଧ୍ୟା ଧୂପ ଛେକ ଡ଼ାକି ସନ୍ଧ୍ୟାଧୂପ ପୂଜା ବସିବ । ରାତି ସାଢେ୯ଟାରେ ମା’ଲକ୍ଷ୍ମୀଠାକୁରାଣୀ ରଥ ନିକଟରେ ପାରମ୍ପରିକ ନୀତି ସାରି ଜଗମୋହନକୁ ବିଜେ କରିବେ । ୯ଟା୩୫ରେ ମହାଲକ୍ଷ୍ମୀଙ୍କୁ ଆଜ୍ଞାମାଳ ଲାଗି ହୋଇ ହେରାପଞ୍ଚମୀ ନୀତି ସମ୍ପନ୍ନ ହେବ। ସନ୍ଧ୍ୟାଧୂପ ଉଠି ମଇଲମ, ଚନ୍ଦନଲାଗି, ବଡସିଂହାର ବେଶ ଓ ବଡସିଂହାର ଭୋଗ ହୋଇ ଠାକୁରଙ୍କ ରାତ୍ର ପହୁଡ ୧ଟା ସୁଦ୍ଧା ଅନୁଷ୍ଠିତ ହେବ ବୋଲି ଶ୍ରୀମନ୍ଦିର ପ୍ରଶାସନ ନୀତି ନିର୍ଘଣ୍ଟ କରିଛି ।

Leave A Reply

Your email address will not be published.